புதுக்கவிதை வடிவில் திருக்குறள்

தகையணங் குறுத்தல்

அணங்குகொல் ஆய்மயில் கொல்லோ கனங்குழை

மாதர்கொல் மாலும்என் நெஞ்சு / 1081

   

அவள் விண்ணில் இருக்க வேண்டியவள்

மண்ணில் அவள் பாதம் பட்டதால்

பூமி பூப்புடைகிறது

மயங்கும் மனதுக்கு விடை எது?

நோக்கினாள் நோக்கெதிர் நோக்குதல் தாக்கணங்கு

தானைக்கொண் டன்னது உடைத்து / 1082

ஓராயிரம் வேல் கொண்டு

தாக்கிய உணர்வு இவளது

கடைப்பார்வைக்கு என்றால்

கட்டழகி என்னை

வெட்டி வீழ்த்திவிட்டாளே

பட்டென்று பார்வையில்

  

பண்டறியேன் கூற்றென் பதனை இனியறிந்தேன்

பெண்டகையால் பேரமார்க் கட்டு / 1083

உயிரோடு உயிர் விலகுவதை

கண்டு கொண்டேன்

பெண்ணே!

உன் பார்வை என்ன 

எமனின் தூதுவனா?

கண்டார் உயிருண்ணும் தோற்றத்தால் பெண்டகைப்

பேதைக்கு அமர்த்தன கண் / 1084

பெண்ணே நீ கத்தியின்றி ரத்தமின்றி

கண்களால் கொலை செய்ய

தெரிந்த அழகிய இராட்ஸசி!

கூற்றமோ கண்ணோ பிணையோ மடவரல்

நோக்கம்இம் மூன்றும் உடைத்து  / 1085

  

நீ

என்ன பாடசாலை?

எல்லாவற்றையும் கண்களாலே

விளக்கி விடுகிறாயே..

மானைப் போன்ற கண்கள்

துள்ளிகுதித்தாடும் கண்கள்

உயிரை ஊனுடன் பறித்தெடுக்கும் கண்கள்

ஐயோ!

சர்வகலா சாலையில்

நித்தமும் கீதம் பாடுபவள் நீ !

கொடும்புருவம் கோடா மறைப்பின் நடுங்கஞார்

செய்யல மன்இவள் கண் / 1086 

பெண்ணே,

இரண்டு வானவில்லை

கொண்டுள்ள அழகிய நிலவு

உன் கண்கள்:

வளைந்த புருவம் நேரானால்

உன் கண்களின் வீச்சிலிருந்து

தப்பித்துக் கொள்வேனோ

கடாஅக் களிற்றின்மேல் கட்படாம் மாதர்

படாஅ முலைமேல் துகில் / 1087 

யானைக்கு முகபடாம் போட்டு மறைத்ததை போல

உன் மனதையும்

மூடாதே பெண்ணே!

மேகம் மறைத்தாலும்

நிலவு தெரிகிறதே!

ஒண்ணுதற் கோஒ உடைந்ததே ஞாட்பினுள்

நண்ணாரும் உட்கும்என் பீடு / 1088

  

ஆயிரம் பேரை வென்று

பரணி கொண்டவன் நான்!

உன் நெற்றிவாள் என்னை

வீழ்த்தியதடி ஒரு நொடியில்.

பிணையோர் மடநோக்கும் நாணும் உடையாட்கு

அணிஎவனோ ஏதில தந்து / 1089

மானின் கண்கள்

பட்டாசுப் பார்வை

மேகம் மூடும் நாணம்

இவற்றைவிட உனக்கு அழகு

சேர்க்க அணிகலன்கள் உண்டா?

உண்டார்கண் அல்லது அடுநறாக் காமம்போல்

கண்டார் மகிழ்செய்தல் இன்று / 1090

தொட்டதும் போதை தரும்

மதுவை விட,

கண்டதும் காதல் தரும் உன்

கண்களை விட

வேறெதும் மகிழ்ச்சி உண்டா?

(முப்பால் தந்த முதல்கவிதை (2010) 

ஆசிரியர் – பிரியா கிருஷ்ணன் 

– கவிதை நூலிலிருந்து, இன்பத்துபாலின் முதல் அதிகாரம்.)